லோகேஷ் கனகராஜ் இயக்கத்தில் விஜய் நடித்துள்ள ‘லியோ’ திரைப்படம் வெளியான 7 நாட்களில் உலக அளவில் ரூ.461 கோடிக்கும் அதிகமாக வசூலித்துள்ளதாக படத்தின் தயாரிப்பு நிறுவனம் அறிவித்துள்ளது.
‘மாஸ்டர்’ படத்துக்குப் பிறகு விஜய் – லோகேஷ் கனகராஜ் கூட்டணியில் உருவான ‘லியோ’ திரைப்படம் கடந்த அக்டோபர் 19-ம் தேதி வெளியானது. செவன் ஸ்கிரீன் ஸ்டூடியோஸ் நிறுவனம் தயாரித்துள்ள இப்படத்தில் த்ரிஷா, கவுதம் வாசுதேவ் மேனன், அர்ஜூன், மன்சூர் அலிகான், சஞ்சய் தத், ப்ரியா ஆனந்த் உள்ளிட்ட பலர் நடித்துள்ளனர். இந்த படத்திற்கு அனிருத் இசையமைத்துள்ளார்.
கலவையான விமர்சனங்களைப் பெற்று வரும் இப்படம் வெளியான முதல் நாள் வசூலாக ரூ.148.5 ஈட்டியதாக படத்தின் தயாரிப்பு நிறுவனம் அதிகாரபூர்வமாக அறிவித்திருந்தது. அதைத் தொடர்ந்து 4 நாட்கள் விடுமுறையில் ரூ.400 கோடியை வசூலை ‘லியோ’ ஈட்டியதாக தெரிவித்தனர்.
தற்போது படம் வெளியாகி 7 நாட்கள் கடந்த நிலையில், உலக அளவில் இதுவரை ரூ.461 கோடிக்கும் அதிகமான வசூலை ‘லியோ’ ஈட்டியுள்ளதாக தயாரிப்பு நிறுவனம் அதிகாரபூர்வமாக அறிவித்துள்ளது. படத்தின் பட்ஜெட் ரூ.250 கோடி அதைத் தாண்டி வசூலித்துள்ளதாக கூறப்படுகிறது.
தீபாவளி வரை பெரிய நடிகர்களின் படங்கள் எதுவும் அடுத்து ரிலீஸ் இல்லை என்பதால் ரஜினியின் ‘ஜெயிலர்’ படத்தின் ஒட்டுமொத்த வசூலான ரூ.600 கோடியை ‘லியோ’ தாண்ட வாய்ப்புள்ளதாக கணிக்கப்படுகிறது.
