தமிழ்த் திரையுலகத்தின் சகாப்தமாக இருந்த ஏவி.எம். புரொடெக்சன்ஸ் நிறுவனம் ஓடிடி வெப் தொடர் தயாரிப்பில் இறங்கியுள்ளது.
தமிழ் ராக்கர்ஸ் என்ற அந்த வெப் தொடர் சைபர் க்ரைம் பின்னால் இருக்கும் இருட்டுப் பக்கங்களை அம்பலப்படுத்தும் ஒரு க்ரைம் தொடராகும்.
அருண் விஜய் முதன்மை பாத்திரத்தில் நடிக்கும் இந்த தொடரில் நடிகை வாணி போஜன், ஐஸ்வர்யா மேனன், அழகம் பெருமாள், வினோதினி வைத்தியநாதன் மற்றும் எம்.எஸ்.பாஸ்கர் ஆகியோர் முக்கிய வேடங்களில் நடித்துள்ளனர். ஈரம் அறிவழகன் இந்தத் தொடரை இயக்கியிருக்கிறார். மனோஜ் குமார் கலைவாணன் கதை, திரைக்கதை எழுதியிருக்கிறார்.
இந்த தமிழ் ராக்கர்ஸ் தொடர், ருத்ரா என்ற காவல்துறை அலுவலரின் வாழ்க்கைக் கதையைப் பேசுகிறது. சைபர் க்ரைம் திருட்டுக்கு எதிரான போரை இந்த வெப் தொடர் நடத்துகிறது.
கட்டுக் கடங்காத ரசிகர்கள் கொண்ட ஒரு நடிகரின் மிகப் பெரிய பட்ஜெட் படம், இணைய திருடர்களினால் களவாடப்பட்டு இணையத்தில் வெளியாகிறது. ருத்ரா இதன் பின்னணியை கண்டுபிடிக்க முயல்கிறார். இதுதான் இந்தத் தொடரின் கதையம்சமாகும்.
இத்தொடர் பற்றி இயக்குநர் அறிவழகன் பேசும்போது “பாரம்பரியமிக்க ஏவி.எம். புரொடக்சன்ஸ் மற்றும் சோனி லிவ் நிறுவனத்துடன் இணைந்து இந்த தொடரை உருவாக்கியதில் எனக்கு மிகுந்த மகிழ்ச்சி.
சோனி லிவ் ஓடிடி தளம் பார்வையாளர்கள் விரும்பும் வகையில், சிறந்த உள்நாட்டு படைப்புகளை வெளியிட்டு வருகிறது, இந்த தமிழ் ராக்கர்ஸ் வெப் தொடர் காவல் துறை அதிகாரியான ருத்ராவின் கதை.
சைபர் க்ரைமின் இருண்ட பக்கத்தையும், பொழுது போக்குத் துறை அதனுடன் எவ்வாறு போராடுகிறது என்கிற உண்மையையும் இந்த தொடர் வெளிப்படுத்தும். இந்த தொடரில் அருண் விஜய் நடித்தது பெருமையாக உள்ளது. சோனி லிவ் தளத்தில் விரைவில் இத்தொடர் வெளியாகவுள்ளது…” என்றார்.
ஏவி.எம். புரொடக்சன்ஸ் நிறுவனத்தின் தயாரிப்பாளரான அருணா குகன் பேசும்போது, “இந்த ‘தமிழ் ராக்கர்ஸ்’ வெப் தொடர் எங்களுக்கு மிகவும் சிறப்பு வாய்ந்த நெருக்கமான தொடராகும்,
ஏனெனில் எங்களின் புகழ் பெற்ற தயாரிப்பு நிறுவனம் மீண்டும் தயாரிப்பில் இறங்கியிருப்பது இந்தத் தொடரின் மூலம்தான். மேலும் இந்த தொடர் மூலம்தான் ஏவி.எம். புரொடக்சன்ஸ் நிறுவனம் முதல்முறையாக ஓடிடி தளத்தில் கால் பதிக்கிறது.
என் சகோதரியும், நிறுவனத்தின் இன்னொரு தயாரிப்பாளருமான அபர்ணாவும் நானும் சைபர் க்ரைம், பைரஸி பொழுது போக்குத் துறையை எவ்வாறு பாதிக்கிறது என்பதை மக்களுக்கு காட்டவும், அதைப் பற்றிய கதையை கூறுவதிலும் மிகவும் ஆர்வமாக இருந்தோம்.
திறமை மிகுந்த இயக்குநர் அறிவழகனுடன் பணி புரிந்ததால், இக்கதையை ஆழமாகவும், அபார திறமையுடனும் காட்சிப்படுத்த முடிந்துள்ளது. அருண் விஜய் சார் இத்தொடரில் நடித்தது இத்தொடருக்கு மிகப் பெரும் பலத்தை தந்ததுள்ளது.
சமீப காலங்களில் அதிகம் பேசப்படும் தொடர்களை, ரசிகர்கள் கொண்டாடும் படைப்புகளை அளித்து வரும் சோனி லிவ் ஓடிடி தளத்தில் எங்களது ‘தமிழ் ராக்கர்ஸ்’ வெப் தொடர் வெளியாவதை காண ஆவலோடு உள்ளோம்…” என்றார்.
