நடிகை சமந்தாவின் நடிப்பில் அமேஸான் பிரைம் என்னும் ஓடிடி தளத்தில் சமீபத்தில் வெளியான ‘தி பேமிலி மேன்’ வெப் சீரீஸ் தமிழ் ஈழப் போராட்டத்தைக் கொச்சைப்படுத்தியும், விடுதலைப்புலிகளையும், பெண் போராளிகளையும் அவமானப்படுத்தும் அளவுக்கான காட்சிகளைக் கொண்டிருந்ததாகச் சொல்லி பல்வேறு தரப்பினரும் இந்த வெப் சீரீஸுக்கு எதிர்ப்பு தெரிவித்தனர்.
ஆனாலும் அந்தத் தொடர் இன்னமும் அமேஸான் தளத்தில் ஒளிபரப்பாகிக் கொண்டுதான் வருகிறது. இந்தத் தொடரைக் கண்டித்து உலகம் முழுவதும் உள்ள ஈழத்து மக்கள் போராட்டத்தில் குதித்துள்ளார்கள்.
லண்டனில் உள்ள அமேஸான் தலைமையகத்தின் முன்பாக லண்டன் வாழ் ஈழத்து மக்கள் பெருந்திரளாக குவிந்து அறப்போராட்டம் நடத்தினார்கள். இதேபோல் அமெரிக்கா, இங்கிலாந்து, நார்வே, பிரான்ஸ், சுவிட்சர்லாந்து ஆகிய நாடுகளில் இருக்கும் ஈழத்து மக்களும் இந்தத் தொடரைக் கண்டித்தும், அமேஸான் நிறுவனத்தை எதிர்த்தும் குரல் கொடுத்துள்ளனர்.
இது குறித்து ஒரு அறிக்கையையும் அவர்கள் வெளியிட்டுள்ளனர்.
அந்த அறிக்கை இது :
“அமேஸான் பிரைம் வீடியோ என்னும் ஓடிடி தளத்தில் வெளியாகியுள்ள ‘தி பேமிலி மேன்-2’ என்னும் திரைப்படத்தில் ஒடுக்குமுறைக்கெதிரான தமிழ் மக்களின் விடுதலைப் போராட்டம் பற்றிய தவறான பார்வையை முன் வைத்திருப்பதை கண்டிக்கவும் இனிமேல் இது போல் தொடராமல் இருக்கவும் நாங்கள் எடுக்கும் முயற்சியை உங்கள் முன் வைத்து அதன் மூலமாக மக்களுக்கு எங்களின் நிலைப்பாட்டை பதிவு செய்ய விரும்புகிறோம்.
முதல் கட்டமாக ‘தி பேமிலி மேன்-2’ இணையத் தொடரை உருவாக்கிய அமேசானின் தலைமை அலுவலங்களின் முன்பாக எங்களின் ஆட்சேபனையை தெரிவித்து வருகின்றோம்.
அத்துடன் புலம்பெயர் வாழ் நாடுகளில் தன்னெழுச்சியாக தமிழ் மக்கள் அடையாள ஆர்ப்பாட்டங்களை கோவிட் விதிமுறைகளுக்கமைய ஒழுங்கு செய்து வருகின்றனர்.
இதன் முதல் கட்டமாக நேற்று இலண்டனில் அமேசான் காரியாலத்தின் முன் ஓர் அமைதி வழி ஆர்ப்பாட்டம் இடம் பெற்றது.
இது போன்ற தொடர்கள் நம் தமிழக மண்ணில் நம்மோடு தாய் உறவுகளாக வாழும் எங்கள் சொந்தங்களையே பயன்படுத்தி எடுக்கப்பட்டிருக்கிறது என்பது வருத்தமளிக்கிறது.
அதாவது இந்த தொடரில் நடித்தவர்கள், எழுதியவர்கள் என தமிழக மண்ணில் இருந்து சிலரால் இப்படி எடுக்கப்பட்டிருக்கிறது. அவர்களின் அறியாமையாக விளக்கிட நினைத்தாலும் இவை எம் மனதை மிகவும் காயப்படுத்தி வலியை அதிகரிக்கிறது.
எனவே வருங்காலத்தில் இது போல் ஒரு படைப்பில் நம் கலைஞர்களோ எழுத்தாளர்களோ இயக்குனர்களோ இணைந்துவிடக் கூடாது என்ற எண்ணத்தில் உலகம் முழுதும் வாழும் தமிழர் அமைப்புகள் மூலமாக இந்த கோரிக்கையை முன் வைக்கிறோம்.
Australian Tamil Congress (ATC), British Tamils Forum (BTF), Irish Tamils Forum (ITF), La Maison du Tamil Eelam (MTE), Norwegian Council of Eelam Tamils (NCET), National Council of Canadian Tamils (NCCT), Solidarity Group for Peace and Justice (SGPJ – South Africa) மற்றும் United States Tamil Action Group (USTAG) ஆகிய அமைப்புகள் இது தொடர்பாக தமிழ் திரைப்பட இயக்குநர்கள் சங்கம், தயாரிப்பாளர்கள் சங்கம் மற்றும் நடிகர் சங்கம் உள்ளிட்ட அமைப்புகளுக்கு கடிதம் ஒன்றை எழுதியிருக்கிறோம்.
“தி ஃபேமிலி மேன் 2′ வலைத் தொடர் “ஒரு கற்பனையான படைப்பு” என்று தயாரிப்பாளர்கள் கூறியிருந்தாலும், ‘ஈழத் தமிழர்கள்’, ‘பருத்தித் துறை’, ‘ஈழம்’ மற்றும் ‘வட இலங்கை’ ஆகிய வார்த்தைகள் பயன்படுத்தப்பட்டவிதம், உருவாக்கப்பட்டிருக்கும் ஈழம் தொடர்பான காட்சிகள் அனைத்துமே ஈழப் போருடன் ஒத்துப் போயிருப்பதும், ஈழத் தமிழர்களை மோசமான முறையில் காட்ட முனையும் நன்கு திட்டமிடப்பட்ட செயலாகவே தெரிகின்றது.
“ஈழத் தமிழர்கள் எங்கு சென்றாலும் அவர்கள் தொடர்ந்து பயங்கரவாதிகளாக இருப்பார்கள் என்று இந்தத் தொடர், பிரச்சாரம் செய்கிறது. மாறாக, கடந்த பன்னிரண்டு ஆண்டுகளாக இன அழிப்பு போன்ற அநீதிக்கு எதிராக நாங்கள் உலக நாட்டு சட்டங்களின்படி போராடி வருகிறோம். ஆனால் இன்றும் விடுதலை பற்றிய எங்கள் எண்ணங்களை அடக்குவதற்கான நோக்கத்துடன் வேலைகள் நடைபெற்று வருகின்றன.
விடுதலைக்காக போராடும் பெண்களின் வாழ்க்கை முறை தவறாகவும், கீழ்த்தரமாகவும், விசமத்தனமாகவும் புனையப்பட்டிருக்கிறது. காரியம் நடக்க வேண்டி தமிழ் பெண்கள் எந்த எல்லைக்கும் செல்வார்கள் என்ற அச்சுறுத்தலை வேறு அது உலக மக்களுக்கு விதைக்கிறது.
தமிழக மக்கள் எப்போதும் ஈழத் தமிழர்களுக்கு ஆதரவாக நிற்பவர்கள். திரையுலகத்தைச் சேர்ந்தவர்களும் மிகவும் ஆதரவளித்துள்ளனர். ஈழத் தமிழர்களை மோசமாக காண்பிக்கும் இது போன்ற திரைப்படங்களைத் தயாரிப்பதைத் தவிர்க்க வேண்டும், இது போன்ற படங்களில் நடிக்க வேண்டாம் என்றும், தயாரிக்க வேண்டாம் என்றும் ஒரு சுற்றறிக்கையை நடிகர் சங்கம் அல்லது தயாரிப்பாளர் சங்கம் வெளியிட வேண்டும்..” என்று அந்தக் கடிதத்தில் கூறப்பட்டுள்ளது.
