சுந்தர்.சி இயக்கத்தில் ஹன்ஷிகா, ஆண்ட்ரியா, ராய் லட்சுமி, வினய் நடிப்பில் உருவான ‘அரண்மனை’ படம் 2014 ஆம் ஆண்டு வெளியாகி பெரும் வெற்றிப் படமாக அமைந்தது. அதனை தொடர்ந்து ‘அரண்மனை’ இரண்டாம் பாகத்தை இயக்கினார், சுந்தர்.சி. அந்தப் படத்தில் த்ரிஷா, ஹன்சிகா முக்கிய வேடங்களில் நடிக்க 2016 ஆம் ஆண்டு வெளியாகி நல்ல வரவேற்பை பெற்றது.
அதன் பிறகு ‘அரண்மனை’ படத்தின் மூன்றாம் பாகத்தையும் இயக்கினார், சுந்தர்.சி. இதில் ஆர்யா, ராஷி கண்ணா, ஆண்ட்ரியா, சாக்சி உட்பட பலர் நடித்தனர். இந்தப் படம் 2021 ஆம் ஆண்டு வெளியாகி கலவையான விமர்சனங்களை பெற்றது.
அதன் பிறகு ‘தலைநகரம் இரண்டாம் பாகம்’ உட்பட சில படங்களில் நடித்த சுந்தர்.சி., இப்போது ‘அரண்மனை’ படத்தின் நான்காம் பாகத்தை இயக்கியிருக்கிறார். இந்தப் படத்தில் தமன்னா, ராஷி கண்ணா, யோகி பாபு உட்பட பலர் நடித்துள்ளனர். ஹிப் ஹாப் ஆதி இசையமைத்திருக்கிறார்.
கோடை விடுமுறையில் குடும்பங்கள் கொண்டாடும் படமாக உருவாகி இருக்கும் இந்தப் படம் அடுத்த மாதம் வெளியாக இருக்கிறது. அதற்கான போஸ்டரை படக்குழு வெளியிட்டு பெரும் எதிர்பார்ப்பை ஏற்படுத்தியுள்ளது
