பிரகாஷ் ராஜ் தன் மகனான ஆதியை பெரிய ஓட்டப் பந்தய வீரனாக உருவாக்க ஆசைப்படுகிறார். அதற்கான பயிற்சிகளை எல்லாம் கொடுத்து வளர்க்கிறார். ஆதியும் கம்பீரமாக தயாராகிறார்.

திடீரென நிகழும்  விபத்து ஒன்றில் பிரகாஷ்ராஜ் இறந்துவிட, ஆதிக்கு ஒரு காலை எடுக்க வேண்டிய சூழல் வருகிறது. இதனால் அவருக்கு செயற்கைக் கால் பொருத்தப்படுகிறது. அதன் பின்னர் சில ஆண்டுகள் கழித்து அப்பாவின் அரசு வேலையை வாரிசு அடிப்படையில் பெற்று அதில் வேலை செய்து வருகிறார் ஆதி.

விபத்துக்கு முன்பிருந்தே அவரைக் காதலித்து வந்த ஹாக்கி வீராங்கனையான நாயகி, கால் போன பின்பும் விடாப்பிடியாக ஆதியைத் திருமணம் செய்து கொள்கிறார். ஆனால், தன் காதல் மனைவியிடம்கூட எந்த ஒட்டுதலும் இல்லாமல் வாழ்ந்து வருகிறார் ஆதி.

இந்நேரத்தில் ஆதிக்கு மதுரை அருகே ஒரு கிராமத்தில் ஓர் ஓட்டப் பந்தய வீராங்கனை இருப்பது தெரிய வருகிறது. அந்தப் பெண்ணை சென்னைக்கு அழைத்து வந்து சரியான டிரைனிங் கொடுத்தால் அவள் இந்தியாவிற்காக உலக அளவில் சாதிப்பாள் என நம்புகிறார் ஆதி. அதற்கான எல்லா முயற்சிகளையும் தனியொரு மனிதனாக எடுக்கிறார்.

ஆனால், அப்பெண்ணின் சாதி அடையாளத்தை வைத்து அவளுக்கு வாய்ப்புகள் மறுக்கப்படுகிறது. இதை ஆதி எப்படி சாமர்த்தியமாக கையாண்டு அப்பெண்ணை சாதனை செய்ய வைக்கிறார் என்பதுதான் இந்தக் ‘கிளாப்’ படத்தின் கதை

நாடக பாணியிலான நடிப்பைக் கொடுக்க வேண்டிய இடங்கள் இருந்தும் படத்தில் மிக மெச்சூடாக நடித்துள்ளார் ஆதி. அவர் ஒரு கால் அற்றவராக நடித்துள்ள நிலையில் நிஜமாகவே அவருக்கு ஒரு கால் இல்லையோ என்று நினைக்கும் அளவில் உடல் வேதனைகளை தாங்கிய முகபாவனைகளை கொண்டு வந்து அசத்தி இருக்கிறார்.

இவருடைய மனைவியாக நடித்துள்ள அறிமுக நடிகை அழகிலும், நடிப்பிலும் அசத்தி இருக்கிறார். க்ளைமாக்ஸ் காட்சியில் அவர் மனம் உடைந்து அழுது, நம்மையும் அழுக வைத்துவிட்டார்.  

ஓட்டப் பந்தய வீராங்கனையாக வரும் கிரிஷா தன்னை இப்படத்திற்காக முழுமையாக அர்ப்பணித்திருக்கிறார். உடலில் வேகமும் கண்களில் சோகமும் என ஒவ்வொரு ப்ரேமிலும் கிரிஷாவிற்கே நிறைய கிளாப்ஸ்.

நெகட்டிவ் கேரக்டரில் வரும் நாசர், சின்னச் சின்ன ரியாக்‌ஷனில்கூட மாஸ் காட்டுகிறார். முனிஷ்காந்த் நடிப்பில் கலாய்ப்பும், எமோஷ்னலும் கலந்திருப்பது படத்திற்கு ப்ளஸ்.   மற்றும் படத்தில் வரும் சிறு சிறு கதாப்பாத்திரங்களும் கவனம் ஈர்க்கிறார்கள்.

இப்படியான படத்திற்கு இசை பெரும் வலு சேர்க்க வேண்டும். பாடல்களில் மட்டும் அப்படியான வலுவை வலுவாகச் சேர்த்துள்ளார்  இளையராஜா. பின்னணி இசையில் போதிய அழுத்தமில்லை என்பது நிஜம்.

படத்தில் கேமரா வொர்க் நேர்த்தியாக இருக்கிறது. ஒரே லொக்கேசனில் மொத்த ரன்னிங் சீன்களையும் எடுத்திருந்தாலும் அதில் கூடுமான அளவில் தன் உழைப்பைக் கொட்டி வித்தியாசம் காட்டியிருக்கிறார் கேமராமேன்.

“அடிக்கிறான்.”, “எழ விடாமல் தடுக்கிறான்” என்ற வழக்கமான புலம்பல் சமாச்சாரங்கள் கதையில் இருந்தாலும் எங்கும் ஓவர் டோஸ் இல்லை என்பது ஆறுதல். மேலும்,  இப்படத்தில் ஒரு நேர்மையான திரைக்கதை இருக்கிறது.

ஓகோவென ‘கிளாப்’ பண்ண முடியாவிட்டாலும், ஒரு முறை நிச்சயமாக ‘கிளாப்’ பண்ணலாம்.

RATING : 3.5 / 5

The post கிளாப் – சினிமா விமர்சனம் appeared first on Touring Talkies.

Srinivasaa Silver Screen நிறுவனத்தின் சார்பில் தயாரிப்பாளர் ஸ்ரீனிவாசா சித்தூரி மிக பிரம்மாண்டமான பட்ஜெட்டில் இந்தப் படத்தைத் தயாரிக்கிறார்.

தெலுங்கு திரையுலகின் இளம் நடிகரான ராம் பொத்தினேனி இந்தப் படத்தில் நாயகனாக நடிக்கிறார். நடிகர் ஆதி பினுஷெட்டி இதுவரை பார்த்திராத வலுவான வில்லன் வேடத்தில் நடிக்கின்றார்.

படத்தில் ‘குரு’ என்ற கதாபாத்திரத்தில் தீய செயல்களுக்கே தலைவனாக இருக்கும் ஒரு மிரட்டலான பாத்திரத்தில் நடிக்கிறார் ஆதி.

கீர்த்தி ஷெட்டி கதாநாயகியாக ‘விசில்’ மகாலட்சுமி என்ற கதாபாத்திரத்திலும், அக்ஷரா கவுடா ஒரு முக்கிய கதாப்பாத்திரத்திலும் நடிக்கின்றனர்.

தேவி ஸ்ரீபிரசாத் இசையமைக்கிறார். பவன்குமார் இப்படத்தை வழங்குகிறார்.        ஆக்‌ஷன் கமர்ஷியல் படங்களுக்காக புகழ் பெற்ற இயக்குநர் லிங்குசாமி இந்தப் படத்தை இயக்குகிறார்.

இந்தப் படம், இரு மொழிகளில் தயாராவதுடன், கோலிவுட்டில் ராமின் அறிமுக படமும் இதுவாகும்.

‘சீடிமார்’ திரைப்பட வெற்றிக்கு பிறகு, Srinivasaa Silver Screen நிறுவனத்தின் தயாரிப்பில் உருவாகும் இந்த ‘தி வாரியர்’ திரைப்படமும் சூப்பர் ஹிட்டாகும் என்று எதிர்பார்க்கப்படுகிறது.

இன்று, மகா சிவராத்திரியை ஒட்டி இந்த ‘தி வாரியர்’ படத்தில் ஆதியின் ஃபர்ஸ்ட் லுக் தோற்றத்தை இந்தப் படக் குழு வெளியிட்டுள்ளது. அவரது கடுமையான தோற்றம் மற்றும் மிரட்டும் லுக் படத்தின் மீதான எதிர்பார்ப்பை அதிகரிக்கச் செய்கிறது.

The post ‘தி வாரியர்’ படத்தில் வில்லனாக நடிக்கும் நடிகர் ஆதி appeared first on Touring Talkies.